വിമാന ടിക്കറ്റ് തട്ടിപ്പ്, ട്രാവൽ ഏജൻസി ഉടമ അറസ്റ്റിൽ
ഇടുക്കി കട്ടപ്പനയിൽ വിദേശയാത്രയ്ക്ക് ടിക്കറ്റ് എടുത്തു നൽകാമെന്ന് പറഞ്ഞ് ആളുകളെ പറ്റിച്ച് ലക്ഷങ്ങൾ തട്ടിയ കേസിൽ ട്രാവൽ ഏജൻസി ഉടമ പിടിയിൽ. കട്ടപ്പന സ്വദേശി കാഞ്ഞിരംന്താനം സാബു (45) ആണ് കട്ടപ്പന പോലീസിന്റെ പിടിയിലായത്. കട്ടപ്പന പഴയ ബസ്റ്റാൻഡിൽ പ്രവർത്തിക്കുന്ന സ്കൈലിങ്ക് ട്രാവൽ ഏജൻസി എന്ന സ്ഥാപനത്തിന്റെ ഉടമയാണ് ഇയാൾ.
ഉപരിപഠനത്തിനും ജോലിക്കുമായി വിദേശരാജ്യങ്ങളിൽ പോകുന്നതിനായി തന്റെ ഏജൻസിയെ സമീപിക്കുന്ന ആളുകളുടെ കയ്യിൽ നിന്നും ലക്ഷങ്ങൾ തന്റെ അക്കൗണ്ടിലേക്ക് വാങ്ങിയ പ്രതി ടിക്കറ്റ് എടുത്ത് നൽകാതെ ടിക്കറ്റ് എല്ലാം ശരിയായി എന്നും ഇടപാടുകാരെ പറഞ്ഞു വിശ്വസിപ്പിച്ച് ആണ് തട്ടിപ്പ് നടത്തിയിരുന്നത്. ജില്ലയുടെ വിവിധ ഭാഗങ്ങളിൽ നിന്നും അൻപതിലധികം പരാതികളാണ് പോലീസിന് ലഭിച്ചിരുന്നത്.
നിരവധി ആളുകൾക്ക് ഉപരിപഠനവും ജോലിയും നഷ്ടമാവുകയും കടക്കണിയിൽ ആവുകയും ചെയ്തു. ആളുകളുടെ കയ്യിൽ നിന്നും പണം തട്ടിയ ശേഷം ഒളിവിൽ പോയ പ്രതിയെ കട്ടപ്പന ഡി വൈ എസ് പി വി എ നിഷാദ് മോനെ നേതൃത്വത്തിലുള്ള പോലീസ് സംഘമാണ് പിടികൂടിയത്. അറസ്റ്റിലായ പ്രതിയെ കോടതിയിൽ ഹാജരാക്കി റിമാൻഡ് ചെയ്തു.
