അക്ഷയ് കുമാറിനെ തല്ലിയാൽ 10 ലക്ഷം രൂപ സമ്മാനം.
അക്ഷയ് കുമാര്‍ നായകനായ ‘ഓ മൈ ഗോഡ് 2’ സിനിമ റിലീസായതിനു പിന്നാലെ വിവാദങ്ങൾക്കും തുടക്കമായി. ചലചിത്രം ഹിന്ദു ദൈവങ്ങളെ അപമാനിക്കുന്നു എന്ന ആക്ഷേപം ഉന്നയിച്ച് പ്രതിഷേധവുമായി ചില സംഘടനകൾ രംഗത്തുവന്നു. സിനിമയിലെ നായകനായ അക്ഷയ് കുമാറിനെ തല്ലുകയോ മുഖത്ത് കരിഓയില്‍ ഒഴിക്കുകയോ ചെയ്യുന്നവര്‍ക്ക് 10 ലക്ഷം രൂപ നല്‍കുമെന്ന് രാഷ്ട്രീയ ബജ്റംഗ് ദള്‍ നേതാവ് ഗോവിന്ദ് പരാസര്‍ പ്രഖ്യാപിച്ചു.
സിനിമ റിലീസ് ചെയ്ത ദിവസം സംഘടന തീയറ്ററുകൾക്കുമുമ്പിൽ പ്രതിഷേധിച്ചിരുന്നു. പ്രതിഷേധക്കാർ അക്ഷയ് കുമാറിന്റെ കോലം കത്തിക്കുകയും രാഷ്ട്രീയ ബജ്റംഗ്ദളിന്റെ വൈസ് പ്രസിഡന്റ് റൗണക് താക്കൂറിന്റെ നേതൃത്വത്തില്‍ തിയേറ്ററിന് പുറത്ത് മുദ്രാവാക്യം വിളിക്കുകയും ചെയ്തു. ഹിന്ദുആത്മീയ നേതാവ് സാധ്വി ഋതംഭരയും ചിത്രത്തിനെതിരെ ആഞ്ഞടിച്ചിരുന്നു. ഹിന്ദു ദൈവങ്ങളെ സിനിമയിൽ അപമാനിക്കുന്നത് മുൻപും സംഭവിച്ചിട്ടുണ്ട്. ഹിന്ദു വിശ്വാസത്തിനു മേലുള്ള കടന്നുകയറ്റം ഞങ്ങൾ വെച്ചുപൊറുപ്പിക്കില്ല. ബോളിവുഡ് ഇത് തുടര്‍ന്നാല്‍ ഹിന്ദുക്കള്‍ റോഡിലിറങ്ങി പ്രതിഷേധിക്കുമെന്നും ശിവഭക്തി തമാശയല്ലെന്നും നിരവധി ഹിന്ദു സംഘടനകളുടെ രക്ഷാധികാരിയായ ഇവര്‍ പറഞ്ഞു.
സെക്സ് എഡ്യൂക്കേഷന്‍ സംബന്ധിച്ച വിഷയം സംസാരിക്കുന്ന ‘ഓ മൈ ഗോഡ് 2’ എന്ന ചിത്രത്തില്‍ ശിവന്‍റെ പ്രതിനിധിയായാണ് അക്ഷയ് കുമാര്‍ എത്തുന്നത്. ചിത്രത്തിന് എ സര്‍ട്ടിഫിക്കറ്റാണ് ലഭിച്ചത്. ആദ്യദിനത്തില്‍ ഒമ്പത് കോടി നേടിയ ചിത്രം, 2012-ൽ പുറത്തിറങ്ങിയ അക്ഷയ് കുമാറിന്റെയും പരേഷ് റാവലിന്റെയും ‘ഓ മൈ ഗോഡ്’ എന്ന ചിത്രത്തിന്റെ തുടർച്ചയാണ്. അമിത് റായ് സംവിധാനം ചെയ്യുന്ന ചിത്രം ആക്ഷേപഹാസ്യ വിഭാഗത്തിലുള്ളതാണ്.
