വീസാ ഫീസ് വര്‍ധിപ്പിക്കും: ഋഷി സുനക്
ലണ്ടന്‍ : യുകെയില്‍ വീസാ ഫീസും ഹെല്‍ത്ത് സര്‍ചാര്‍ജും ഗണ്യമായി വര്‍ദ്ധിപ്പിക്കേണ്ടി വരുമെന്ന് പ്രധാനമന്ത്രി ഋഷി സുനക്. തീരുമാനം നടപ്പിലായാൽ ഇന്ത്യക്കാരുള്‍പ്പെടെയുള്ള വീസാ അപേക്ഷകര്‍ക്കു കനത്ത തിരിച്ചടിയായിരിക്കും. അധ്യാപകര്‍, പൊലീസ്, ജൂനിയര്‍ ഡോക്ടര്‍മാര്‍, മറ്റു പൊതുമേഖല ജീവനക്കാര്‍ എന്നിവരുടെ ശമ്പളം വര്‍ദ്ധിപ്പിക്കണമെന്ന ശിപാര്‍ശ അംഗീകരിക്കാന്‍ കടുത്ത സമ്മര്‍ദമാണ് പ്രധാനമന്ത്രിക്കുമേലുള്ളത്. പൊതുമേഖലയിലെ ശമ്പള വര്‍ധന നടപ്പിൽ വരുത്തുന്നതിൻ്റെ ഭാഗമായിട്ടാണ് പുതിയ നീക്കമെന്നും ഋഷി സുനക് പറഞ്ഞു.
നാണ്യപ്പെരുപ്പത്തിനു ഇടയാകുമെന്നതിനാൽ, നികുതി വര്‍ദ്ധിപ്പിക്കാനോ കൂടുതല്‍ കടമെടുക്കാനോ ഋഷി സുനക് തയാറല്ല. ആ സാഹചര്യത്തില്‍ രാജ്യത്തേക്ക് എത്താനായി വീസയ്ക്ക് അപേക്ഷിക്കുന്ന കുടിയേറ്റകാരിൽ നിന്നും കൂടുതല്‍ ഫീസ് ഈടാക്കി പണം സമാഹരിക്കുവാനാണ് പ്രധാന മന്ത്രിയുടെ നീക്കം. അതിനു പുറമേ എന്‍.എച്ച്.എസ് സേവനത്തിനായി നല്‍കുന്ന ഇമിഗ്രേഷന്‍ ഹെല്‍ത്ത് സര്‍ചാര്‍ജും ഗണ്യമായി വര്‍ധിപ്പിക്കേണ്ടിവരുമെന്ന് ഋഷി സുനക് പറഞ്ഞു. ശമ്പളവര്‍ധന നടപ്പാക്കാത്തതില്‍ പ്രതിഷേധിച്ച് ഇംഗ്ലണ്ടിലെ ജൂനിയര്‍ ഡോക്ടര്‍മാര്‍ പണിമുടക്ക് ആരംഭിച്ചിരിക്കുകയാണ്. 35 ശതമാനം ശമ്പളവര്‍ധനവാണ് ഇവര്‍ ആവശ്യപ്പെടുന്നത്.
